येनाक्षरसमाम्नायमधिगम्य महेश्वरात् ।
कृत्स्नं व्याकरणं प्रोक्तं तस्मै पाणिनये नमः ॥
अष्टाध्यायी जगन्माता यस्य चित्तात्समुत्थिता ।
वेदानामुपकाराय तस्मै पाणिनये नमः ॥
शब्दब्रह्म समाराध्य कृतवान् यो विलक्षणम् ।
सर्वाश्चर्यमिदं शास्त्रं तस्मै पाणिनये नमः ॥
येन धौता गिरः पुंसां विमलैः शब्दवारिभिः ।
तमश्चाज्ञानजं भिन्नं तस्मै पाणिनये नमः ॥
अष्टकं पाणिनेर्दिव्यं शब्दशास्त्रमलौकिकम् ।
आकुमारं यशो यस्य तस्मै पाणिनये नमः ॥
शब्दरत्नाकरोद्भूतं शैवं रत्नचतुर्दशम् ।
शास्त्रे येन समायोजि तस्मै पाणिनये नमः ॥
ब्रह्माण्डारणिनिर्मन्थादुत्थितज्ञानवह्निना ।
निर्ममे शब्दशास्त्रं यस्तस्मै पाणिनये नमः ॥
व्याकृतं दर्शितं येन त्रय्याः वाचः परं पदम् ।
सिद्धिसोपानभूतं यत् तस्मै पाणिनये नमः ॥
यस्य भासावभासन्ते वैदिका लौकिकास्तथा ।
शब्दा रूपं विवृत्येमे तस्मै पाणिनये नमः ॥
वाचं कामदुघां कर्तुं दिव्यं शास्त्रं प्रणीतवान् ।
भवं प्रसाद्य भक्त्या यस्तस्मै पाणिनये नमः ॥
यः परं पदमन्वेष्टुं पदराशीं व्यबीभजत् ।
मोक्षमार्गप्रकाशाय तस्मै पाणिनये नमः ॥
यतो नावर्तते जीवः शब्दशास्त्रमुपासिता ।
तत्पदं दर्शितं येन तस्मै पाणिनये नमः ॥
अज्ञानान्धस्य लोकस्य ज्ञानाञ्जनशलाकया ।
चक्षुरुन्मीलितं येन तस्मै पाणिनये नमः ॥
वाक्यकारं वररुचिं भाष्यकारं पतञ्जलिम् ।
पाणिनिं सूत्रकारं च प्रणतोऽस्मि मुनित्रयम् ॥
More tools in the right menu.